ون بن جدلان

~~ ون ابن جدلان ~~
ون أبن جـدلان مـن لايـعٍ لاعـه
كن فـي كبـدي دوافيـر صناعـي
ألعب المنكـوس وأحـب روباعـه
مملٍ في الوقـت والوقـت خداعـي
مادريت أن ضحكة الوقـت خداعـه
شفت مدخالي ولاشفـت مطلاعـي
لابغيت أسـج والا انبسـط ساعـه
دق قلبي من وراء حدب الأضلاعي
كن مابيـن الضلـوع آلـة طباعـة
تشتغـل لانمـت وأقـوم مرتاعـي
هـم قلبـي مايـفـرق تجمَـاعـه
غير جر الصوت والنـاس هجاعـي
فاقدٍ لـي سلعـةٍ وأكبـر أبضاعـه
سلعـةٍ تشـراء ولاهيـب تنباعـي
رفقة الطيـب ليـا غيـر أطباعـه
أشهد أنهـا كيـةٍ توجـع أوجاعـي
راكب إلي صممه صاحب أصناعـه
جمس بيك أب من حديثات الأنواعي
الغريب الـي جديـدٍ مـن أنواعـه
حوض رفرف مايبي شد وشراعـي
لا أونس البنزيـن عجـلٍ تفرقاعـه
مخطرٍ من سرعتـه يقلـع أقلاعـي
لاتحرك شفت في القـاع مشلاعـه
والتواير تظهر المـاء مـن القاعـي
ينعش القلـب الحزيـن أبتهملاعـه
لامشـا قـام يتهملـع تهمـلاعـي
لاوطى الأرض العتش كن تهزَاعـه
بنت شيخٍ طامحٍ مـن ولـد راعـي
في رجاء الغايب تحَـرا لمرجاعـه
تنقـد العشـاق وتطـق الأصباعـي
نفسها من جملـة النـاس منصاعـه
ماتبـي إلا واحـدٍ ذكـره أيشاعـي
ينحر اللي يأخـذ الطيـب بذراعـه
الصديق الصافي الصامـل الواعـي
الوفاء والطيـب ساسـه ومنباعـه
يوم بعض الطيب تقليـد وصناعـي
لاوصلتوا فأخبروني عن أوضاعـه
وأخبروا راعي السمارا عن أوضاعي
أنشـدو ويـش السبايـب بمهزاعـه
لاعلـي ناقـص ولا أبيـه فزَاعـي
ودَنـا نرضيـه ونحـاول أقناعـه
كان بن مهمل بعـد يسمـع الداعـي
كـان يبغـا حـق للحـق قطَاعـه
نقنعـة والحـق ماعنـه مجزاعـي
وكان مبغضٍ في الرياجيـل بتَاعـه
لايجـي ناقـد ويلحقنـي أرياعـي
لصَديـق نخلَـي النفـس خضَاعـه
مانـوريـه الجـفـا والتمطَـاعـي
الصداقـة عندنـا ذخـر وطماعـه
صحبةٍ ماهيـب صحبـة تمتاعـي
حد جدتهـا علـى البـرق لماعـه
وإن خذت يومين مفعولهـا ضاعـي
إن تليمنـا علـى العـز والطاعـه
وأن تفرقنـا فجـوج الله أوساعـي
ما أطرد المقفي ليا صفط أشراعـه
مخبـل اللـي للمقفـيـن تبَـاعـي
من يحط أذنه علـى كـل سماعـه
جـاه فرقـاً مابعدهـا تجمَـاعـي
والزباد أختـام هرجـي ومطلاعـه
يدفعه من ريحة المسـك ذعذاعـي

سلمت يداك يابو النشاما

وأظن الموضوع مكرر لكن يازين هذه القصيدة وناقلها وقائلها

شكرا يالنشمي ولا عدمت هذا الطرح المميز

الله يعطيك العافيه
لاهنت بيض الله وجهك
تحياتي واحترامي