عشيّت الاحد والقابله ليلة الاثنين= اقلّب دفاتر ما مضى لي وما فاتي
واعاتب وافكر واتذكر من الغالين= واجر الونين بداخل الذات من ذاتي
يسرّح بي الهاجس ويضوي مع الضاوين=وتخنقني العبرات في بعض الاوقاتي
ظروف الزمان تشيّب الراس لا ذالحين= واراعي الظروف ولالقيت المراعاتي
فخر كل عبدٍ لالتزم في عراوي الدين= ولا عزّةٍ بالبهرجه فالمنصّاتي
ادوّر على الاولى ولكن مدري وين =وتوجهت للاخرى ورحت بمتاهاتي
ياربي عليك امري توكّلت بك ونعين= تدل الذي تاهت به الاتجاهاتي
زرعت الرجا بمفرج الكرب قاضي الدين= ولاغيره اللي يستمع في مناجاتي
واجامل مع العالم وكنّي من السالين= مافكرت فالدنيا لاراحت ولاجاتي
واجمّل بني عمّي ولاني قصير ايدين=لاما احتمى الميدان بتبين وقفاتي
صبورٍ على الدنيا واهدّي دموع العين=على ماجرى لي من علوم ومحساتي
فلانيب هافي وانزل لمستوى الهافين=ولانيب من سوى لنفسه دعاياتي
لكن من يكيل المدّ باكيل له صاعين= على شان يعرف ويش معنى العداواتي
ضعاف النفوس تحاول تنقّص الوافين= على شان تبقى في محيط المساواتي
وانا ناشي بالطيب مع جملةٍ ناشين= نبي نعانق نجوم الفلك والمجراتي
هذا موجزي ياقاصي الناس والادنين= وابلغ من يحب الجمايل تحياتي