ســــــكـــتــــــم بــــكــــــتــــــم (1)

السمو : اوووف يا ابو نواف شوفت عشاء بو عبدالعزيز الليلة يالله أن تكثر خيره . ياني دقيت في العشاء حتى طلعت عيوني .
ابو نواف : الله يكثر خيره ويرحم والديه .
السمو : وبعدين نسيت أقلك أن الرحمة مبروكة ما شاء الله يا الأمطار والخير اللي جانا .
ابو نواف : علينا وعليك .
السمو : اخوي وشفيك تقولها وأنت ضايق خاطرك .
ابو نواف : لا ... لا... ما فيه شيء .
السمو : علينا يا أبو نواف أعرفك زين ..... من جد وشفيك ؟
ابو نواف : ياخوي قلت ما فيه شيء ... أنت ما تفهم !!!
السمو : وسع خاطرك (ويغني :يا ضايق الصدر بالله وسع الخاطر ... وسع الخاطر ) الناس مبسوطة بالأجواء والأمطار وأنت زعلان ..
ابو نواف : إن هذا بلاء بوك يا عقاب !!
السمو : أفااا .. أفاااا ... زعلان من رحمة ربي .
ابو نواف : لا يا شيخ .. استغفر الله ما قصدي كذا ..بس مقاولين ( أبو بطن ) ما خلوا فرحتنا تكتمل بالمطر .
السمو : ههههههه ... وش مقاولين ( أبو بطن )؟؟
ابو نواف : هذولاا سلمك الله اللي يأخذون المشاريع والمناقصات الحكومية من المقاولين الرئيسين .. وتعرف من مقاول بالباطن إلى اللي تحته . حتى توصل لواحد له بطن صغير .
السمو : ههههههه .. طيب أنت وش مضيق خاطرك في الموضوع ؟
ابو نواف : أبقولك وش مضيق خاطري .. أنت وخشتك .
السمو : يا الله قلي يا ( محمد حمزه ) شكلك بتسوي لنا ( أصابع الزمن ) جزء ثاني .
ابو نواف : ابو متعب الملك عبدالله الله يطول عمره من يوم استلم الحكم وإحنا في طفرة غير مسبوقة في المشاريع ، ومن المشاريع المستحدثة في ديرتي ( مشروع ازدواج الخط اللي يبدأ من الحازمي حتى مثلث الحرف )
السمو : أيه .. صادق .. أشوفه .. اللي يتبع بلدية الحازمي ..
ابو نواف : مضبوووووط .. هذا سلمك الله بدوا فيه قبل سنتين وتخيل ما أنجزوا منه الإ 6كم ..
السمو : ههههههه .. يعني كل سنة 3 كم .. يعني بحسبه واحد شاطر في الرياضيات 30 كم في عشر سنوات ... حلوووو بصراحه انجاز يحسب للمقاول ..
ابونواف : ما عليه يأخذ راحته لو يبي ينجز في السنة 1كم .بس لا يودي حياتنا وحياة الناس في خطر .!!
السمو : اوووووف ليش وش سوى المقاول ؟
ابو نواف : ما تصدق إنه صارت حوادث ووفيات بسبب إهمال المقاول . من عدم وضع إشارات تحذيرية وفوضويته في الردم .. يا الله ان ترحم اللي توفى منهم ويعافي العليل اللي لازمته علته بسبب هالمقاول ..
المشكلة ما هيب هنا ..المشكلة انه سوّى توسعه جديدة في الخط بشكل عشوائي .. مما يدل انه المشكلة بتستمر .
السمو : بس وأنا خوك الحوادث بقدرة الله ومقدر ومكتوب .
ابو نواف : ادري كل شيء بقدرة الله .. لكن هو سبب من الأسباب .
السمو : طيب وش المشكلة اللي في الخط الحين يا ( عمرو موسى ) .
ابو نواف : الخط القديم تعرف هو مسار واحد .. وسوّو التوسعة من يمينه ويساره علشان يقسمون الخط ويخلونه مسارين ... اليوم يوم نزل المطر تخيل طلعت توسعة المقاول الجديد كلها تجمعات مويه من المطر ..والخط القديم ما فيه تجمعات مويه ..
السمو : كيف صارت تجمعات المويه هذي ؟
ابو نواف : يوم سفلت المقاول التوسعة الجديدة ما سفلتها بشكل متساوي ،، سفلتها أي كلام .. ما ردم زي الناس ورص الردميه علشان أذا سفلت ما يصير فيه بروز وهبوط في الإسفلت ،، والدليل على كلامي تجمعات المويه اللي حصلت اللي يمكن تسبب حوادث ..
السمو : يا كثر ما قلت كلمة سفلته ...
ابونواف : والدليل على كلامي قارن بين الخط القديم والتوسعه اللي جنبه من المقاول الجديد .
السمو : طلع ما عنده ذمه هالمقاول وما يخاف الله ..
ابو نواف : ما عليك يا السمو .. بيحتكم عند ملك الملوك مع الأبرياء اللي توفوا بسبب إهماله وغشه للناس وتدليسهم .. لكن عند الله تجتمع الخصوم .
السمو : أهاااا.. هذا اللي مضيق خاطرك .. أنت ووجهك . ومسوي فيها (عمرو موسى ) ...أقول خلك ( سكتم بكتم ) ..ما عاد الإ أنت وأشكالك تعلم آل بوبطن بشغلهم .

أم نواف : يا ولد ... يا ولد .. يا أبو نواف قم ... قم .. صل الظهر ..أصم ما تسمع لي ساعة أًصحي فيك .
ابو نواف : ( يقوم مفزوع وخايف من نومه ) ..أنا ..هاااه .. ما أدري ...
أم نواف : بسم الله عليك وش صار لك ما تسمع أنت ..
ابو نواف : الإ اسمع ... وأشوووووف ... وأتكلم .... بس يقولون خلك ( سكتم بكتم ) ..

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــ

• ابو نواف والسمو شخصية واحده . لا تمثل الإ رأيها فقط .

الله الله
ممكن تعطيني النص هذا
سأدفع لك الذي تريده
عندي مشروع نصوص تلفزونية تعالج المشاكل اليومية في المجتمع السعودي
وناقص علي نص ابي اكمل الثلاثين
مع إني عارف إن الدنيا سكتم بكتم ولا حياة لمن تنادي
بو نواف لاتحرمنا من إبداعك
مروري وتقديري واحترامي ووووووووووووو.....

روعة النص من روعة اصحابه اللي قرأته صحيح وحاصل لكن المشكله فينا مافيه تعاون بينا ليش اذا شفنا القصور مانبلغ امارة المنطقه وبسلامتهم اعضاء المجالس البلدية اللي صجونا صوتوا لنا تكفون والنهاية كنهم مايشوفون
لكن كل حسابه على الله مشكوروماقصرت على طرح مثل هذا الموضوع

بيض الله وجهك يابو نواف على هذا الموضوع الرائع الغير مستغر على قلمك الذي يتكلم الواقع
اما بالنسبه لموضوعك المهم جدا فنحن لانقول الا حسبنا الله ونعم الوكيل
واصلا البلديه راضيه على هذا الشيء لانهم يوميا يمشون على هذا الطريق يعني لم يلفت نظر رئيس بلدية الحازمي هذا الفساد الواضح
ولكن لايوجد مشكله الا ولها حل وان شاء الله الحل موجود وانا في طريقي الى هذا الحل ان شاء الله ودعواتكم لي بالتوفيق
اشكرك اخوي السمو على هذا الموضوع
وتقبل مروري المتواضع
دمت بحفظ الرحمن

يالبييييييييييييييييييييييه

ابو نواف يكتب ويتألق في سماء الإبداع

فعلا يعجبني من يعيش هموم المواطن ومعاناتهم حتى لو كان بعيدا
الغريب في الأمر أنا تعودنا على هذه المقالب من المقاولين حتى صارت روتينا نعيشه بشكل دائم
يابو نواف كتابة ساخره هادفه
فعلا هذا الطريق لا يزال حتى الآن تحت الإنشاء وسيظل تحت الإنشاء الى وقت غير معلوم
ابونوف والسمو
أشكرك والشكر قليل في حقك

طلب بسيط ( أنت رجل أعلامي من الطراز الأول وهذا رأيي فيك منذ عشر سنوات ,, فإالى متى وانت بعيد عن المحافل الإعلاميه ,, ننتظر منك المزيد يابو نواف)

يعطيك العافيه على هذا الابداع الغير مستغرب
حبكه رائعه للحوار .. واسلوب رائع

يعطيك العافيه

تقبل مروري وتحياتي

ابو مهند : اشكرك على اطرائك وانت تأمر على الروح وليس على ما تسطره أقلامنا...

سيف ابن العلا: مداخلتك رائعه لكن لا زلنا نعيش تفكير المواطن الضعيف الذي يتغير صوته الى صوت مبحوح خجول عند دخوله الى أحد المسؤولين عند طلبه لحق من حقوقه.. متى ما زال من تفكيرنا بعبع المسؤول وآمنا ان وجوده لخدمة المواطن .. أقول لك حينها أننا تقدمنا خطوة واحدة فقط...*

مبدع ياغالي
موووضوع رائع وجميل
وانا معك انها معاناه كبيرة ولكن لاحياة لمن تنادي
وانت طبقت مقولة خلك مع نفسك ياابونوااف بهذا الكتابة الجميلة

وانت جمعت سكتم بكتم وخلك مع نفسك ووووين المالكي يشووف


وودي وتقديري

الاخ الفاضل ابو نواف

حقيقه ماقرأته سيناريو مبدع وحبكه دراميه لا يكتبه الاشخص مميز
وكاتب نص من الطراز الفريد

أنت وضعت اليد على الجرح وتبحث عن البلسم
ماتتاضيق منه من طريق الحازمي الحرف وهذه المعاناه التي يعيشه كل قاطني هذا الطريق
الكل يتضايق منه
وليس هذا الطريق فقط
بل كل طرق بيشة من شمالها الى جنوبها

لا حسيب ولا رقيب عليهم والحبل مازال على الغارب

اتمنى أن يصل صوتك وصوت كل مواطن الى المسؤليين
فحكومتنا الرشيده لم تقصر وعلى راسها خادم الحرمين الشريفين
ولكن اين اصحاب الضمير
الذين يخافون الله ويكونوا على قدر المسؤليه المناطه بهم


أخيرا
شكرا لك ابا نواف واعذرني على الاطاله
لك فائق شكري ووابل عطري

ابداااااااااااااااااع ..
قويييية لأبعد حد ..
وصل ربي يوفقك ..