قصيده للشاعر ناصر بن هندي الشهراني

هذه القصيده موجهه من الشاعر/ناصر بن عايض بن هندي الشهرانـــــي رحمة الله

إلى الشاعر/سيف ابن محماس المشعبــــــي السبيعي

ونتي ونت يتيم(ن)نهـت لامـه وابـوه ***

هلت دموعـه مـن الحـزن ودان نفلـه

بعد ماتوا بقي محزون والنـاس كرهـوه ***

وقام بـه جـده وبـدل حزونـه وكفلـه

وبعد خمس شهور جات المنايا وافجعـوه ***

انتهى جده من العمر فـي ساقـة هلـه

وعاش مع عمانه اللي على الشين اجبروه ***

ينطرونه لاحضر لاكل واجـزم ماكلـه

ودرسوا ورعانهم بالمـدارس واحرمـوه ***

يشعبونه بالرعايـا علـى غيـر مهلـه

من طلوع الشمس حتى مغيبـه ماكفـوه ***

القلوب غلاظ واقـلال رحمـه واجهلـه

وحالتي تشبـه لحالـه بعـد ماوصفـوه ***

من عنيد(ن)حاف قلبـي وهـزه وانتلـه

وجيت باخذ ثار قلبي من اللـي صوبـوه ***

افصابني من شلف ابو زيد خوفٍ وزمله

ياهل المعروف شوفـوا لقلبـي وانقـذوه ***

من غرام الجادل اللي غدربـه واختلـه

وصلوا سيف ابن محماس علمي وازهموه ***

لاجل يفزع طيب الصيت صوبي بعجلـه

قولوا الشايب بغى السلم والناس حربـوه ***

واعترض له فارسٍ لـه عوايـد واقتلـه

ارتجل به من جواده وبالشلـف اطعنـوه ***

ومن قتل له مسلم(ن)عمد بالشرع احملـه

غير صابه فارس(ن)للشريعـه مادعـوه ***

والجريح يصيح والجرح ماشـي ادملـه

يحسبونه مات بالحال فاقفـوا واتركـوه ***

رحمة(ن)من خالق الكون ماهوب اعملـه

ومر به طرقية(ن)في مطيحه واعرفـوه ***

وقام يزهم سيف قالـوا نجيبـه وازهلـه

وسيف مايخفاه طب الجروح وماحكـوه ***

جرعة(ن)من محو والاعسل بطن انحلـه

من جبال(ن)شاهقه والطراقـي ماجنـوه ***

مير راعي الصنف يعرف محله واجبلـه

والسلام اختـام والعلـم جاكـم سنعـوه ***

من كلاه الداب يرتـاع لاشـاف اسملـه

فرد الشاعر سيف ابن محماس بهذه القصيده:

جفن عيني حرم النوم عقـب اللـي دعـوه ***

من جنوب المملكـه جـاه صوت(ن)وافتلـه

جاه صوت(ن)من صديق(ن)شكى يوم اشغلوه ***

وانشغل فكري وقمت وزعلت مـن ازعلـه

الصديـق العابـد الساجـد اللـي كـونـوه ***

عالم(ن)عاداتهـا قبـس حرب(ن)واشغلـه

مخلفين الفكر مانـي بـداري ويـن جـوه ***

والوطن يعـرف مغازيـه وعـره وسهلـه

يوم عارضهم مع الدرب مـدري عارضـوه ***

أو نصيبه في جهتهم عـن الـدرب اعدلـه

صوبـوه وراح مـن عندهـم ماعالـجـوه ***

شـح دكتـور الزناتـي ابمحـوه واعسلـه

والخطـا ماينقبـل والعـوارف مـارضـوه ***

يحسبونه عـرق راكـوب نخلـه واعتلـه

والصويب دواه معروف عنـد اللـي رمـوه ***

وصفة علاجه عسل صافي(ن) مـن منحلـه

قبل ناصر كم زعيم(ن)هـل الحـب افتنـوه ***

مـن تولـع بالغناديـر يبـطـي مـادلـه

وناصر احرقني بنار الهوى يـوم احرقـوه ***

احرقته البيـض بالحـب والعفـو ا شملـه

والصديـق اللـي بيفـزع لهـم ماوجهـوه ***

والجبال مـن السـراوات لا ضلـع اثملـه

لازم احـدد مكـان العسـل يـوم ادغمـوه ***

من هروب اليـا جبـل لبـد خلفـه واقبلـه

الرجل دايـم يعامـل صديقـه مثـل اخـوه ***

لا دعـاه بساعـة الضيـق مابـان افشلـه

يستعيـن بواحد(ن)مايخيـب مـن رجـوه ***

الكريم امنـزل الغيـث مـن بعـد امحلـه

خدمة الاصحاب خدمة شـرف لـو كلفـوه ***

مثل ماقـال المثـل كـل حمل(ن)واجملـه

خدمتك من واجبي والهـدف لـي وضحـوه ***

لـو طريقـه فيـه مليـون طلعـه وانزلـه

يابن هندي جاك مضمـون علمـي واقبلـوه ***

من جواهر شاعر(ن)صاغهـا فـي معملـه