في مجالس العرب

هذه الابيات لمجالس العرب الادبيه
واتقبل النقد والاقتراحات على القصيده

مبدأ القصايد والقوافي والاوزان=ذكر الولي في المبتدأ جلّ شانه
جلّ جلاله ربّنا خير رحمن= الخالق اللي كوّن انسه وجانه
أطلبه يهديني على درب الايمان= ويدلني درب التقى والرزانه
لعلّ قلبٍ يظهر احساسه السان = ويترجم الخافي ويعصم لسانه
سلامةٍ تبقى على طول الازمان= مادام له في منهج الطيب خانه
اللي يدوّر للجمايل على شان= مكـسب وفود واحترام ومكانه
لاصار للامداح بالفعل ميدان= ذكره وفعله صار شاهد عيانه
عليه نثني له تحيّه وعرفان= والشكر يثنى له جزيل امتنانه
رقّاه صيته وإشهر الصيت شهران= صيتٍ جميل وقايم الحظّ عانه
بنى بفعله في علا الطيب بنيان = في قمّة الامجاد واطلق عنانه
اطلق عنانه وإعلن بعلمه اعلان= علمه وصل للشام وارض الكنانه
له بالقمم رمزٍ ومركز وعنوان= ويجمع وجيه الخير والشعر صانه
أكبر فخر ويرجّح بكلّ ميزان= صرح الادب والشعر شيّد كيانه
دوّن قصص واشعار عصره بديوان= ديوان يحفظها لاميّل زمانه
بدعت هيضي وان حصل فيه نقصان= فالمعذره والنفس دايم مدانه
يوم اجهش الخاطر وشرّعت بيبان= اغوص وسط البحر واجيب دانه
هذي هجوسي جات قدرٍ وسفطان= والهاجس الخافي ترى القاف بانه

*ملاحظه: جملة مجالس العرب الادبيه, كل حرف منها بداية بيت