أبتدي بسم الله الرحمن وأطلب ربي = عالمٍ حال البشر ومدبرٍ أكوانه
يكتب التوفيق والتيسير للمتزوّج = وكل من شارك وجا متعنّيٍ في شانه
العريس اللي نبارك له وكلٍ بارك = وأعتبر نفسي أخوه إلاّ أعز إخوانه
بإسمه أرحّب وأكرر مرحباً بالزاير = عد همال المزون اللي سرى ودانه
ومرحباً بضيوف أبو عايض وأخص الغلبا = يا سبيع الجود يا أهل الجود يا عنوانه
الرجال أهل الكرم وأهل الفعول الجزلة = كل منهم للضيوف مشرّعٍ بيبانه
تكرمون الجار وأيضا تمنون الخايف = ومن زبنكم ما يخاف الغدر من عدوانه
فأرحبوا ثم أرحبوا ونكرر الترحيبة = للضيوف ولزملاه وربعه وجيرانه
مرحباً في بيشة الفيحاء بإسم من فيها = بيشة أم الخير في عيون أهلها كالدانه
ومرحباً في شان من سد اللزوم وكفّى = طيّبٍ من طيب بوه ومن طنخ جدّانه
ذا ولد عايض وخاله من شيوخ الغلبا = لأنتخى به واحدٍ مهموم زاح أحزانه
الولد من راس بوه ومن زعامة خاله = لابسٍ بشت الفخر ومجمعٍ تيجانه
والكفو مثله بصلب هديل دايم يفخر = الكِرام اللي بفعل الطيب له عوّانه
هم هل المدات وأهل الطيب وأهل الفزعة = ورعهم متميّزٍ بالطيب بين أقرانه
وأن سألكم سايلٍ راعي القصيدة من هو = خبروه إن الحليسي يفخر بقيفانه
ومدحي لربعي بني عمي يشوّش راسي = والقبايل كلها بأهل الفخر مليانه
وأختم بذكر النبي الهاشمي محمد = وأسأل الرحمن توفيقه لنا وإحسانه