ليه الظروف تشين لاقلت بتزين؟= وليه القلوب اشتات كلٍ على امره؟

وليه الوجيه اليوم تظهربلونين؟= وليه الوفا والطيب ينهان قدره؟

هذا سوال اللي غدا بين نارين= والي خفا يصعب على الفكرحصره

غدت ركايبنا وحنا مقيمين= والحمل كايد مامعي فيه قدره

مليت من يمكن وبكره وبعدين= ياطول صبري في حرى شمس بكره

ولَى زمان اول وجا عام الالفين= عامٍ خذا من هيبة العصرشهره

وانا على حالي من اول الى الحين = مابه جديدٍ يشرح البال ذكره

كني غريرٍ ينثر الما على الطين= يبني ولا اصبح هدت الريح جدره

واخس عينٍ كلما ذكرت العين= عينٍ بها هزوٍ ومقتٍ وكبره

واختامها اطلب ربنا قولوا آمين= انه يروف بصابرٍ طال صيره