ياالله في نو (ن) نصوبه تراجد = يقبل من المنشأ ترازم رعوده
من مكـسر الفنجال شهرين لالبد = حتى هشيم القشع يخضر عوده
سيله مع ريحان حول على السد = يوم (ن) يجي دونه ويوم (ن) يروده
غبيط مزنه فوق عبران يركد = كن الرفايا ربطة في حيوده
يجيك سيله مع ملاح أيتزــبد= لاخف سيل (ن) جاك سيل (ن) يزوده
يصبح تلاع (ن) للبداوين مارد = حتى على جاله تمايل وروده
يحرك على نمره ويبرق ويرعد = وبله على الصفيان تسمع رجوده
سيله مع رمحان يصبح ويهجد = حتى دنن تطفر منابع عدوده
من طول عشبه فوق بعضه ممدد = يصفق ليا هبت نسانيس نوده
الطير بأحسن لحن قامت تغرد = من فوق ضهيان (ن) تمايل فنوده
هذا هوى بالي وذا اليوم لسعد = شوف الخضار وكل يوم (ن) نروده
ونا احمد الله لابتي تمن الحد = والكفو من طبعه يراعي حدوده
شعر/ علي بن شوكان