عدّ ما ذعذع من الغربي نسانيس وهبايب=
يا سلام الله سلامٍ فيه خير وفيه خيره
هاجسي ورّد وبصخر من قوافيه العجايب=
ومن سمعها قال راعيها عسى ربّي يجيره
أبتدينا في سباق وكلنا ربع وحبايب=
وكل خطوه للامام بسلّة سيوفٍ شطيره
والمجالس فاتنتها لايجي فيها طلايب=
ما بتوخذ كون من شاعر وقيفانه جديره
ياشعاعيرٍ عزاز وصفهم مافيه خايب=
ماقصرتوا عن ورود العدّ والهمّه كبيره
أستميتوا بالجزاله والوفا والفال طايب=
واتحدتوا وحدةٍ بالطيب للاجيال سيره
كلّ شاعر كالجمل لاقام يضرس لك بنايب=
وان حضر فالصّف يرصف رصف ويبيّن هديره
لانزاع ولا فراق ولاشتام ولا سبايب=
هذي الخوّه وكلٍّ من قصى دارٍ وديره
أن تجمّعنا تجمعنا على طيب وشبايب=
وان تفرقنا فجوج الله على خلقه كثيره
وابن آدم ياشعرانا دايمٍ مخطي وصايب=
واقبلوا منّي تحيّاتٍ بها المسك وعبيره