سلام كنبود عود فاح نشناشه = يليق بك يا محمد عبر الإعلامي
إتعيش يا شاعر شفتك على الشاشه = ذكرتني اللي مضى من حلو الأيامي
أبدعت في رغبة الجمهور وإنعاشه = وأتحفتنا من رصيدٍ مُتْحَفٍ سامي
هامتك للمرجلة والطيب شوّاشه = وتتعب لشان الخوي وتسج الأقدامي
يوم الردي عايشٍ في مملكة لاشه = ولا درى إن الزمن للناس مادامي
ما كل من هام شعرن هاضبه جاشه = إلاّ أنت ياللي تحطم كل الأرقامي
الله يعدّيك ظيم الدهر وأبلاشه = ويحقق الله طموحاتك والأحلامي

من مدلهمٍّ نصوبه جات رشّاشه = في النوّه اللي رعدها له ترزّامي
برّاقها يشبه التصوير وفلاشه = في البيت الأبيض ليا زاروه حكّامي
حيا الله اللي مراويحه ومغباشه = الطير من دونها يتعب ليا حامي
وإن شاف صيد من القنّاص منحاشه = ياتي بها لو رماها والله الرامي
وإن جيت تبغى لحاف الطيب وفراشه = دوّر وتلقى حبوسن تروي الضامي
دعوا البجادي نهار الهوش هواشه = من صلب شهران قومٍ سوقهم حامي
ياللي مشاعرك بالتعبير جيّاشه = ذكّرتني يا سعد في ماضي أعوامي
الدهر يومين للصعلوك والباشه = كلن من الوقت لحقه فطر وصيامي
يومٍ ورى فوهت المدفع ونتّاشه = سحابة العج من خلفي وقدّامي
واليوم الآخر نعيشه مثل من عاشه = ماني وحيد العنى في الشرق والشامي
واللي يحوش الردا والطيب ما حاشه = بيني وبينه عداوة كفر وإسلامي