هذه القصيده من قريحة الشاعر متعب بن سعيد بن متعب المهداني القحطاني يشكي معاناته من ظروف الحياه لعدم توظيفه معلم بوزارة التربيه والتعليم وقد طلب من الشيخ / فيصل بن علي بن جريب ال سرار
بأن يجاريه أويرد على القصيده التي لم تكن مسنده للشيخ.

بــسم الـذي لا راد ينفــذ مــــراده **عليــه مــا غيــره عليه اتكالي

ربٍ عليـــه العبـــد كل اعتمـــاده **جلــى وتعــالـى الله ماله مثالي

من بعدعليه ذكرالله ورازق عباده **أبدى وعبر بالشعر ما بدالي


هــات القلــم يالقـرم وأطلق قياده **خلني أسجل في الورق ما طرالي

سـجل علـى الأوراق نص الإفاده ** قصة من الواقع ولا هي خيالي

فرحـت يوم إنـي خـذيت الشهاده **وبشرت فيها كل من كان غالي

وهلـت تباشـير الفـرح والسعاده **وحققت حلم العمر وارتاح بالي

ولكن حصل شيٍ ولا هوب عاده **شيٍ هدم صرحٍ بنيته ليالي


شــيٍ يخـل العقــل يفقــد رشاده **وخطرٍ على العاقل يصيبه هبالي

قــالو لنـا وبكـل هـون وركاده **يا مدور التعين يا هملالي


أصـبحت عاطل و البطالة قلاده **وحلم الوظيفة صار صعب المنالي

واليوم حطيـت الشهادة وساده **وطويت عن عد المناوي حبالي


لاصــار مـا سر المجد اجتهاده **ويش العمل يا طيبين الرجالي


عاش الموظف فرحته بالزياده **وأنا انتظاري يا مخاليق طالي

ترى المواطن خدمته في بلاده **أكبر شرف من غير شك وجدالي

وترى الفراغ اليوم يكثر فساده**في عصر داعين الفتن والظلالي


وشوف جيش الهم جهز عتاده**ناوي على التخريب والاحتلالي


والقلب ثاروضاق وأعلن جهاده**وقال احتلالي والله انه محالي


وشـوف جـيش الهم زود عناده **فيما يقول القلب عيا يبالي


أقـول يا قلـب الـشقى والقــراده **تخضع لنا بالسلم ولا القتالي


ودارات رحات الحرب حرب الإباده**والسلم مايذكر ولاله مجالي


وإنما صحـى حظـي وفـارق رقـاده**أنشهد إن الهم بيد بحالي

ـــــــــــــــ ردود الشيخ/ فيصل بن علي بن جريب ــــــــــــــــــ

يــا راكبــاً حـراً قطيـب شــداده **يلوح وسمه رقمتين و هلالي

عليـه خرجـه والكتب والزواده **وغمر يبوج البعد لوكان خالي

نصه بيوت أهل الشرف ولرياده**يشهد لهم بالطيب من كل عالي

تلقــى غلامــاً طيــب الخــط قاده**مع المكارم له لقا واتصالي


متعب سليل المجد وابن السياده **من لابته تاريخها ما يزالي


قحطان ما فيها للعداء من هواده**على العداء مثل الجبال الثقالي


وقلــه تـرى دنيــاك مثـل الكتاده **ماذكرت إلا بالعـنا أول وتالي


لاتـــــشتكي هــمٍ وغــم ونكــاده **تلقى السعد في طيبات المفالي


والخـــط ليمــا نــار فـدره وهاده **واللزم عرى التقوى المتان الجلالي

واللبس من الدنيا ثياب الزهاده **والعافية زادٍ على الماء الزلالي


ولا كل من يــزرع تهنا حصاده **والله هو معطى العطايا الجزالي

الله رزق نملـه وحوت وجراده **يجزل عطى المخلوق لو ما يسالي

محداً حوى رزقــه بقوه زناده **الرزق عند الله عزيز الجلالي


ولو كل مخلوق تحقق مراده **ما كان في دنياك مر وحالي


واللي على الشدات ما به جلاده**تلقاه ليذعـذع النود مالي


والفارس اللي ما يعنن جواده**يطيح في دقلة قروم العيالي


ولو الرزق يقنص كان شرواك صاده**لو في جبال الهند وقفار مالي

أنظــر بعينــك فـــي صــبي الــبلاده **عايش وهو قلبه من الهم سالي

والوضـــع لا تنظــر بعينــك سواده**انظر لبرقٍ له سنا واشتعالي

واصبر علــى حــر الزمـان وبراده **فلابـد من يومٍ تشد الرحالي


واشكر تــرى مــن يشكر الله زاده **وأطلب من المعبود كـسبٍ حلالي

وصلاة ربي عــد نبــت الحمـــاده ** وعداد ما يقرأ السور كل تالي

على رســول الله ســـيد عبــــاده **صلى وسلم عدما سيل سالي